|
|
|
Eà Cometa dea speransa
'na sera, vardando el cièo da 'na stansa,
go visto, a ocio nudo, eà cometa dea speransa,
e par tante sere, eà go osservàa,
parchè nel cièo limpido, al caear del sol, eà vegneva iluminàa.
Za do mia àni fa,
un gran prodigio se ga verificà,
durante el periodo del tempo gèo,
'ndandoghe drio a 'na cometa, i pastori i ga trovà,
dentro 'na staea, nato un putèo.
Eà storia eà dise ch'el jera el Re d'amor,
vegnuo su eà tèra, par essar par tuti el Salvador,
nato da 'na fameja poareta,
ma adorà dai Magi Re, che i ga seguio eà cometa.
Stavolta eà cometa eà xe vegnua in primavera,
e se a ga vista par tante volte, nee prime ore dea sera,
par mi, xe a prima volta che vedo 'na cometa benon,
e questo el xe segno del'avegnua Ressuression.
El xe un bon segno vardar i astri in cièo,
i ne fa capir quanto sto mondo el sia bèo,
e par tante sere me go serà ne eà me scura stansa,
par vedar e seguir mejo, eà cometa de a me speransa.
Livio Pecolo
Treviso, 9 aprile 1997
Foto della Cometa Hale-Boop ripresa da Petrus la sera del 29/3/1997
